குடும்பங்களின் வாரிசு ஆதிக்கத்தில் இந்திய அரசியல்

புது தில்லி, ஜூன் 10: இந்தியா சுதந்திரம் பெற்றதில் இருந்து தேசிய அரசியலில் மட்டுமின்றி மாநில அரசியலிலும் பல இடங்களில் ஒரு சில குடும்பத்தினர்தான் தொடர்ந்து ஆதிக்கம் செலுத்தி வருகின்றனர்.மன்னராட்சி முறை ஒழிந்து விட்டது என்று கூறிவிட்டாலும், இந்தியாவில் பல நிலைகளில் ஒரே குடும்பத்தைச் சேர்ந்தவர்கள்தான் அமைச்சர், எம்.பி., எம்.எல்.ஏ., கட்சிகளின் உயர் பதவிகள் என ஆட்சியிலும், கட்சியிலும் தங்கள் ஆதிக்கத்தைச் செலுத்தி வருகின்றனர். கட்சியைக் குடும்பச் சொத்தாக மாற்றிவிட்டதாக இவர்களுக்கு எதிராக கடும் விமர்சனங்கள் எழுந்தாலும், அதனை தங்கள் பேச்சாற்றலால் சமாளித்து வாரிசுகளுக்கும், உற்றார், உறவினர்களுக்கும் பதவிகளைப் பகிர்ந்தளிக்கும் சுயநலப் போக்கை மாற்றிக் கொள்வதே இல்லை. ஆட்சி, அதிகாரம் பதவி சுகம் அவர்களை இந்த அளவுக்கு கொண்டு வந்துள்ளது.முலாயம் குடும்பத்தில் 6-வது நபர்: இதற்கு சமீபத்திய உதாரணம் உத்தரப் பிரதேச முதல்வர் அகிலேஷ் யாதவின் மனைவி டிம்பிள் யாதவ், எம்.பி.யாகத் தேர்வு செய்யப்பட்டுள்ளது.சமாஜவாதி கட்சித் தலைவர் முலாயம் சிங்கின் குடும்பத்தில் இருந்து 6-வது நபராக தேர்தல் மூலம் பதவியைப் பெற்றுள்ளார் டிம்பிள் யாதவ்.முலாயம் சிங் மக்களவை உறுப்பினராக உள்ளார். அவரது மகன் அகிலேஷ்தான் உத்தரப் பிரதேச முதல்வர், மருமகன் தர்மேந்திர யாதவ், உறவினர் ராம்கோபால் யாதவ் ஆகியோரும் எம்.பி.க்களாக உள்ளனர். முலாயமின் சகோதரர் சிவபால் யாதவ் மாநில அமைச்சராக உள்ளார்.குடும்பம் ஒன்று, கட்சி வேறு: மகன், மகள், மருமகள், மனைவி உள்ளிட்டோர் அரசியலுக்கு வருவது இந்தியாவுக்குப் புதிது அல்ல. இதற்கு நேருவின் குடும்பம் சிறந்த உதாரணம். இந்திரா காந்தியின் மருமகளான சோனியா காந்திதான், இப்போது மத்திய அரசை இயக்கும் சக்தியாக உள்ளார். மற்றொரு மருமகள் மேனகா காந்தி, காங்கிரஸின் எதிரணியான பாஜகவில் உள்ளார். இவர்களது பிள்ளைகள் ராகுல் காந்தி, வருண் காந்தி ஆகியோரும் எம்.பி.க்கள்தான்.சோனியாவின் கேள்வி: முன்னதாக 2004-ம் ஆண்டில் ராகுலுக்கு எம்.பி. சீட் வழங்கப்பட்டது தொடர்பாக கேள்வி எழுப்பப்பட்டபோது, "ஏன் எங்கள் கட்சிக்கு எதிராக மட்டும் குடும்ப அரசியல் என்ற கேள்வியை எழுப்புகிறீர்கள். மற்ற கட்சியை விட்டுவிடுகிறீர்கள்' என்று கேள்வி எழுப்பினார் சோனியா.குடும்ப அரசியலுக்கு எந்த மாநிலமும் விதிவிலக்கு அல்ல என்பதுதான் சமீபகால இந்திய அரசியல் சூழ்நிலை. பிகாரில் தனக்கு அரசியல் சிக்கல் ஏற்பட்டபோது, தனது மனைவியை முதல்வராக்கி அரசியலுக்கு அழைத்து வந்தார் லாலு பிரசாத்.மாநிலக் கட்சிகள்: தமிழகத்தில் திமுக தலைவர் கருணாநிதியின் மகன்கள் ஸ்டாலின், அழகிரி என குடும்பத்தினர் பலர் அரசியலில் உள்ளனர். கருணாநிதியின் மகள் கனிமொழியும் எம்.பி.தான்.பாமகவில் டாக்டர் ராமதாûஸ அடுத்து கட்சியில் முக்கியத்துவம் பெற்றுள்ளவர் அவரது மகன் அன்புமணி.ஆந்திர முதல்வராக இருந்த சந்திரபாபு நாயுடு, அந்த மாநில மக்களின் செல்வாக்கை நீண்டகாலம் பெற்றிருந்த என்.டி.ராமராவின் மருமகன். கேரள முன்னாள் முதல்வர் மறைந்த கே. கருணாகரனின் மகன் முரளிதரன் தந்தை வழியில் அரசியலுக்கு வந்தவர்.முன்னாள் பிரதமர் எச்.டி.தேவகெüடாவின் மகன் எச்.டி.குமாரசாமிதான் மதசார்பற்ற ஜனதா தளம் கட்சியின் தலைவர். மற்றொரு மகன் எச்.டி. ரேவண்ணாவும் அரசியலில்தான் உள்ளார்.தேசியவாத காங்கிரஸ் தலைவரும், மத்திய வேளாண்துறை அமைச்சருமான சரத்பவார் தனது மகள் சுப்ரியா சுலேவை எம்.பி.யாக்கி அழகு பார்த்தார். மத்திய நிதியமைச்சர் பிரணாப் முகர்ஜியின் மகன் அபிஜீத் மேற்கு வங்கத்தில் எம்.எல்.ஏ.வாக உள்ளார்.எந்தக் கட்சியும் விதிவிலக்கு அல்ல: குடும்ப அரசியல் குற்றசாட்டை காங்கிரஸ் மீது பாஜக கூறினாலும், அவர்களும் முழுமையாக குடும்ப அரசியலை ஒதுக்கியவர்கள் என்று கூற முடியாது. ராஜஸ்தானின் முன்னாள் பாஜக முதல்வர் வசுந்தரா ராஜே சிந்தியா, குடும்ப அரசியல் வழி வந்தவர்தான். அவரது சகோதரி யசோதரா ராஜேயும் எம்.பி.தான். வசுந்தராவின் மகன் துஷ்யந்த் சிங்கும் எம்.பி.யாக உள்ளார்.இமாசலபிரதேச பாஜக முதல்வர் பிரேம் குமார் துமலின் மகன் அனுராக் தாகூரும் மக்களவை உறுப்பினர். கர்நாடகத்தில் சர்ச்சைக்குப் பெயர்போன பாஜக தலைவரும், முன்னாள் முதல்வருமான எடியூரப்பாவும் தனது மகன் ராகவேந்திராவை எம்.பி.யாக்கியுள்ளார்.காஷ்மீரில் பரூக் அப்துல்லாவின் வாரிசு, தில்லியில் முதல்வர் ஷீலா தீட்ஷித்தின் வாரிசு, ஹரியாணாவில் முதல்வர் பூபிந்தர் சிங் ஹூடாவின் வாரிசு, ஆந்திரத்தில் காங்கிரஸ் முதல்வராக இருந்த ராஜசேகர ரெட்டியின் வாரிசு, மகாராஷ்டிரத்தின் பால்தாக்கரேவின் மகன், பேரன். அதே மாநிலத்தில் காங்கிரஸின் பிருதிவிராஜ் சவாண் என வாரிசு அரசியலை வழி நடத்தாத அரசியல்வாதிகளே இல்லை.உள்ளூர் உதாரணங்கள்: தேசிய, மாநில அளவில் என்று மட்டுமல்லாது உள்ளூர் அளவிலும் மாநில அமைச்சர்கள், எம்.எல்.ஏ.க்கள் ஆகியோரும் தங்கள் வாரிசுகளை தங்களது அரசியல் வாரிசுகளாகத்தான் வளர்த்து வருகின்றனர். இதற்கு மாநில அளவில் ஏராளமான உதாரணங்களைக் கூறலாம். நாட்டு நலனுக்காக அரசியலுக்கு வந்தவர்கள் போய், தங்கள் வீட்டு நலனுக்காக வாரிசுகளை அரசியலுக்கு அழைத்து வருவதே இப்போதைய அரசியல்வாதிகளின் முதன்மைப் பணியாக உள்ளது.

ஆட்டோ கட்டணம் உயர்வால் சைக்கிள் ரிக்ஷாவுக்கு மாறிய பயணிகள்

பெட்ரோல் விலை உயர்வு நடுத்தர மக்களை கடுமையாக பாதித்துள்ளது. ஆட்டோ கட்டணம் உயர்ந்து விட்ட நிலையில் அடுத்து என்னென்ன விலை உயர போகிறதோ என்ற கவலை ஒவ்வொருவர் மனதிலும் உள்ளது.

பஸ்சில் கூட்டம் அதிகமாக இருப்பதால் வேலைக்கு செல்வோர் ஆட்டோவை நாடி செல்கின்றனர். பணம் செலவானால் பரவா இல்லை. சரியான நேரத்துக்கு செல்லவேண்டும் என்று ஆட்டோவில் ஏறுகிறார்கள். ஆனால் பெட்ரோல் விலை உயர்வால் ஆட்டோ கட்டணம் உயர்ந்து விட்டது.

2 முதல் 3 கிலோ மீட்டர் தூரத்தில் உள்ள இடங்களுக்கு ஆட்டோவில் செல்லும் சிலர் கட்டணம் கட்டுப்படியாகாததால் மாற்று வழியை யோசிக்கிறார்கள். அவர்கள் மனதில் முதலில் தோன்றுவது சைக்கிள் ரிக்ஷாதான். சைக்கிள் ரிக்ஷா தொழில் சென்னை நகரில் சைக்கிள் ரிக்ஷாவை வால் டாக்ஸ் ரோடு, சவுகார்பேட்டை, யானைகவுனி, வடசென்னை பகுதிகளில் அதிகம் காணலாம்.

புரசை வாக்கத்திலும் சைக்கிள் ரிக்ஷாக்கள் ஓடுகின்றன. சைக்கிள் ரிக்ஷாவில் வயதானவர்கள், வடநாட்டுக் காரர்கள்தான் அதிகம் சவாரி செய்கிறார்கள். தற்போது ஆட்டோ கட்டண உயர்வால் கூடுதல் நேரமானாலும் பரவாயில்லை என்று சைக்கிள் ரிக்ஷாவுக்கு மாற தொடங்கி விட்டார்கள்.

வால்டாக்ஸ் ரோட்டில் உள்ள ஸ்டாண்டில் சவாரிக்காக காத்திருந்த ரிக்ஷா ஓட்டுபவர்களின் கருத்து வருமாறு:-

ரிக்ஷா தொழிலாளி குணசேகரன்:- சென்னை நகரில் 12,827 ரிக்ஷாக்கள் ஓடியது. இப்போது 2,700 ரிக்ஷாக்கள் மட்டும் உள்ளது. இந்திக்காரர்கள் தான் ரிக்ஷாவில் விரும்பி செல்கிறார்கள். அவர்களை நம்பித்தான் எங்கள் பிழைப்பு உள்ளது.

தமிழ் ஆட்கள் ரிக்ஷாவை விரும்புவதில்லை. ஆட்டோ கட்டணம் உயர்வால் சிறிது தூரத்தில் உள்ள இடங்களுக்கு செல்ல ரிக்ஷாவை அவர்கள் விரும்புவார்கள். இங்கிருந்து (வால்டாக்ஸ் ரோடு) சவுகார்பேட்டைக்கு செல்ல ரூ.30 முதல் ரூ.40 வரை கேட்போம். ஆட்டோவில் இரு மடங்கு கேட்பார்கள். குறுகலான சந்துக்கள் நிறைந்த சவுகார்பேட்டை போன்ற பகுதிகளில் ஆட்டோக்கள் செல்லாது. ஆனால் சைக்கிள் ரிக்ஷா சந்துக்களில் எளிதாக சென்று பயணியின் வீட்டு வாசலில் இறங்கி விடுவோம்.

ரிக்ஷா தொழிலாளி பெரியசாமி:- சென்ட்ரல் ரெயில் நிலையத்தில் இருந்து வரும் வட மாநில பயணிகள் ரிக்ஷாவை விரும்புகிறார்கள். பயணிகளுக்கு மட்டும்தான் கட்டணம் வசூலிப்போம். லக்கேஜுக்களுக்கு வசூலிக்க மாட்டோம்.

வடமாநிலத்தை சேர்ந்த குப்தா:- சைக்கிள் ரிக்ஷாவில் செல்வதால் செலவு குறைவு. மேலும் வீட்டு வாசலில் இறக்கி விடுவார்கள். இதனால் நாங்கள் பெரும்பாலும் ரிக்ஷாவைதான் விரும்புவோம். சென்ட்ரல் ரெயில் நிலையத்துக்கு வரும் வட மாநில பயணிகள் குடும்பத்துடன் சைக்கிள் ரிக்ஷாவில் ஏறிச் செல்கிறார்கள். தற்போது ஆட்டோ கட்டண உயர்வால் தமிழ் ஆட்களில் சிலர் அருகில் உள்ள வீட்டுக்கு  ரிக்ஷாவில் சென்றதை பார்க்க முடிந்தது.

இதுபோல் சைக்கிள் ரிக்ஷாவில் பயணம் செய்வது அதிகரித்தால் சைக்கிள் ரிக்ஷா தொழிலாளிகளின் வாழ்க்கை முன்னேறும்.

ஏர் இந்தியா விமான நிறுவன பைலட்டுகளின் வேலை நிறுத்தம், நேற்று 10வது நாளாக தொடர்ந்தது-188 கோடி ரூபாய் நஷ்டம்

புதுடில்லி: ஏர் இந்தியா விமான நிறுவன பைலட்டுகளின் வேலை நிறுத்தம், நேற்று 10வது நாளாக தொடர்ந்தது. 10 நாட்களாக நடக்கும் போராட்டத்தால், ஏர் இந்தியா நிறுவனத்திற்கு, 188 கோடி ரூபாய் நஷ்டம் ஏற்பட்டுள்ளது.

வேலை நிறுத்தம் முடிவுக்கு வருவதற்கான அறிகுறிகள் தென்படாத நிலையில், ஏர் இந்தியா நிறுவனத்தின், அனைத்து அங்கீகரிக்கப்பட்ட தொழிற்சங்கங்களில் கூட்டத்தை, சிவில் விமானப் போக்குவரத்து அமைச்சகம், அடுத்த வாரம் கூட்டியுள்ளது. பல்வேறு கோரிக்கைகளை வலியுறுத்தி, ஏர் இந்தியா விமான பைலட்டுகள் வேலை நிறுத்தப் போராட்டத்தில் குதித்துள்ளனர். அவர்களின் போராட்டம் நேற்று, 10வது நாளாக நீடித்தது.

இந்நிலையில், ஏர் இந்தியா நிறுவனத்தின் மூத்த அதிகாரி கூறியதாவது: அவசர கால திட்டத்தின் அடிப்படையில், தற்போது, குறைந்தபட்ச அளவுக்கு மட்டுமே, சர்வதேச விமானங்கள் இயக்கப்பட்டு வருகின்றன. அமெரிக்கா மற்றும் ஐரோப்பாவுக்கான பல விமான சேவைகள் ஒன்றிணைக்கப்பட்டுள்ளன. பைலட்டுகள் போராட்டம் காரணமாக, டிக்கெட்டுகள் ரத்து, போயிங்-777 ரக விமானங்கள் இயக்கப்படாமல் நிறுத்தி வைக்கப்பட்டிருப்பது, பணிக்கு வந்தும் வேலையில்லாத தொழிலாளர்கள் போன்றவற்றால், தினமும் விமான நிறுவனத்திற்கு, 13 கோடி ரூபாய் நஷ்டம் ஏற்படுகிறது. மொத்தத்தில், பல வகையிலும், இதுவரை 188 கோடி ரூபாய் இழப்பு ஏற்பட்டுள்ளது.

பயண திட்டம் பாதிப்பு: சர்வதேச வழித்தடங்களுக்கு, ஏ-320, ஏ-321, ஏ-330 ரக விமானங்களை, ஏர் இந்தியா இயக்கி வருகிறது. 17 போயிங்-777 விமானங்களில் எட்டு விமானங்கள் மட்டுமே இயக்கப்படுகின்றன. போராட்டம் காரணமாக, ஏர் இந்தியா எக்ஸ்பிரஸ் நிறுவனமும் பாதிப்புக்கு உள்ளாகியுள்ளது. பைலட்டுகளின் வேலை நிறுத்தம், விமானங்கள் ரத்து போன்றவற்றால், நூற்றுக்கணக்கான மக்களின் விடுமுறைக் கால பயணத் திட்டங்கள் பாதிக்கப்பட்டுள்ளன. பைலட்டுகள் பணிக்கு வரும் வரை, அவர்களுடன் யாரும் பேச்சுவார்த்தை நடத்தத் தயாராக இல்லை. நீக்கப்பட்ட பைலட்டுகளை வேலையில் சேர்ப்பது உட்பட அனைத்து பிரச்னைகளையும் பரிசீலிக்க, அரசு தயாராக உள்ளது. இருந்தாலும், வேலை நிறுத்தம் முடிவுக்கு வருவதற்கான அறிகுறிகள் தென்படவில்லை. விரைவில், வரும் என நம்புகிறோம். இவ்வாறு அதிகாரி கூறினார்.

அடுத்த வாரம் பேச்சு: இந்நிலையில், மத்திய விமான போக்குவரத்துத் துறை அமைச்சர் அஜித்சிங் நேற்று நிருபர்களிடம் கூறுகையில், ""ஏர் இந்தியா தொழிலாளர்களின் பல்வேறு கோரிக்கைகள் குறித்து, அனைத்து அங்கீகரிக்கப்பட்ட தொழிற்சங்கங்களின் பிரதிநிதிகளுடன், அடுத்த வாரம் மத்திய அரசு பேச்சு வார்த்தை நடத்தும். அப்போது, பதவி உயர்வு உட்பட, பல பிரச்னைகள் குறித்து பேசப்படும்,'' என்றார். மத்திய அரசு அடுத்த வாரம் நடத்தவுள்ள, ஏர் இந்தியாவின் அனைத்து அங்கீகரிக்கப்பட்ட தொழிற்சங்கப் பிரதிநிதிகள் கூட்டத்திற்கு, இந்திய பைலட்டுகள் கில்டு (ஐ.பி.ஜி.) அழைக்கப்படுமா என்பது குறித்து, எதுவும் தெரிவிக்கப்படவில்லை. பேச்சு வார்த்தை குறித்து, இந்திய பைலட்டுகள் கில்டு இணைச் செயலர் தவ்சீப் முக்கதம் மும்பையில் கூறுகையில், "மத்திய அரசு அடுத்த வாரம் நடத்தவுள்ள பேச்சு வார்த்தையில், எங்கள் சங்கம் நிச்சயம் பங்கேற்கும்.

அது வேறு, இது வேறு: ஆனால், இது தொடர்பாக, எங்களுக்கு எந்தவித அழைப்பும் இதுவரை வரவில்லை. தொழிற்சங்கத்தினருடன் பேச்சுவார்த்தை என்பது வேறு, எங்கள் போராட்டம் வேறு. எங்களது சங்கத்தைச் சேர்ந்த, 71 பைலட்டுகளை, ஏர் இந்தியா நிர்வாகம் பணி நீக்கம் செய்துள்ள நிலையில், நாங்கள் எப்படி பணிக்கு திரும்ப முடியும்,'' என்றார். ஏர் இந்தியாவில், 13 அங்கீகரிக்கப்பட்ட தொழிற்சங்கங்களும், 28 ஆயிரம் தொழிலாளர்களும் உள்ளனர். இதில், போராட்டத்தில் குதித்துள்ள இந்திய பைலட்டுகள் கில்டு சங்கத்தின் அங்கீகாரத்தை, ஒன்பது தினங்களுக்கு முன், மத்திய அரசு ரத்து செய்து விட்டது என்பது குறிப்பிடத்தக்கது.